Lekeitio betidanik bizi-bizirik egon den herria da. Gure arbasoetatik hasita gaur egun ere, gure ingurunea maite eta miresten jarraitzen dugu lekeitiarrok. Baina herri honek gordetzen duen benetako altxorra ez da bere itsasertza, ez dira inguruko hondartzak edo bere paisaia paregabea. Lekeitioren balore nagusia, herritarrak eurak dira.
Mugimenduz betetako herria gara, herritar euskaldun, alai eta kantarien portu. Herritik, herriarentzako eskaintzak egiteaz nekatzen ez garenak, bakoitza bere txokotik, gauden lekuan gaudela.
Lekeitioko udala kontziente da horretaz eta pribilegio horren zaindari izateko ahalegina egingo dugu. Herriaren zerbitzura egongo baita momentu oro herritar guztiona den etxea eta bere hormen artean lanean ari garen pertsonak.
Horregatik, ireki ditzagun herriko ateak parez pare, bertan daudenentzako, bisitan, etorri nahi duten guztientzako, edo etorkizuneko lekeitiar berrientzako. Eta nola ez, ireki ditzagun gure ateak herrian egon ezin duten baina dauden lekuan daudela egunero geurekin jarraitzen duten lekeitiar guztiei ere.
Zatozen txokotik zatozela, beraz, ondo etorria izango zara. Ziur gaude ez zarela esku-hutsik bueltatuko. Bizi dezagun Lekeitio, zaindu dezagun Lekeitio!
Maitane Larrauri Fraile
Lekeitioko alkatea